Зачим, за лЂтами оная грубост(ь) поганская, и прироженьє влекущеє на марност(ь) того свЂта так поразило, же потомкове оных побожных благочестивых самодержцов, княжат руских, свЂта сего красотами уведеныє а науками не выученыє, упали в великоє лакомство, около панованя великую хтивост(ь) узяли и роздЂлили ся: єдины тут зостали, а другіє у полночных краях панства осЂли (и тыє долъше у своем панстве тревали). И якъ собЂ очи лупали о панства, один другому выдираючи, а на помочъ противко собЂ сусЂдов ограничных зводячи — яко Венкгров, Поляков и Литвы, великоє кровопролитіє межи собою чинили. Зачим оныє помочники победивши супостатовъ их, потом и самих побеждали, и панство Рускоє в руки ихъ приходило. Зачим церкви божіє з их окрасами на лупъ приходили: злото, сребро и оноє дорогоє камЂня, и книги зобрано, яко то на око обачишъ у самом Крако†корунном, и в костелах рымских полно того. Книг словенских великими склепами знайдешъ замкненыхъ, которых на свЂт не выпустят. Также єст(ь) и ве Львове у мниховъ Доминиканов склеп великій книг наших словенских учителских до купы знесеных по збуреню и осягненю панства Руского.
И так то много зашкодило панству Рускому велми, же не могли школъ и наукъ посполитых разширяти, и оных не фундовано. Бо коли бы были науку мЂли, тогди бы за невідомостю и глупством своимъ не пришли до таковоЂ погибели! Читаючи хроники полскіє знайдешъ о томъ достаточне, як Поляци Рускіє панства посЂдали попріятеливши ся з ними и цорки 1 своє за Русычов давши через ных своє обычає оздобныє и науку укоренили. Так иж Русь, посполитовавши ся з ними позавидЂли их обычаєм, их мо†и наукам и не маючи своих наукъ у науки рымскіє своє дЂти давати почали, которыє за науками и вЂры навыкли. И такъ по малу малу науками своими все панство Рускоє до вЂры рымскоє привели, ижъ потомкове княжат руских з вЂры православноє на рымскую выкрестили ся, и назвиска и имена собЂ поотмЂняли, якобы ніколи не знашли ся быти потомками благочестивых прародителей своих.
